‘बू तूं राजी’ क्हानी च चित्रत डोगरा जनजीवन ते संस्कृति रिमझिम गुप्ता, शोधछात्रा, डोगरी विभाग, जम्मू विष्वविद्यालय,

Abstract

पद्मा सचदेव होरें गी डोगरा जनजीवन, उत्थूं दी भाषा, संस्कृति, लाबा-लबास, खान-पान, रीति रवाजें कन्नै खासा लगाऽ ऐ। ते एह् सारे रंग-बरंगे फुल्ल उ’नें अपनी क्हानी ‘बू तूं राजी’ फुलवाड़ी च बड़े गै सलीके ते करीने कन्नै सजाए बनकाए दे न ते जिंदी सगंधी इस क्हानी दे हर पास्सै मसूस होंदी ऐ पर इस फुलवाड़ी च फुल्लें दे कन्नै किष ऐसे बिसले कंडे बी न जेह्ड़े प्रथा दे नांऽ पर निरन्तर नारी दा शोषण करा दे न। असल च, लेखिका ने इस क्हानी च प्रथाएं दी रस्सिएं च बज्जे दे उस डोगरा समाज दा चित्रण कीते दा ऐ जिस च नसब किष उज्जल गै नेईं हा। किष कबैह्तां बी हियां जेह्ड़ियां अंदरा-अंदरां साढ़े समाजै गी खोखला करा दियां हियां ते अज्ज बी करा दियां न।